Festas

A padroa do municipio, Santa Marta, recibe a súa homenaxe en pleno verán. Estes festexos, de marcado carácter popular, comezan o 27 de xullo coa lectura do pregón e conclúen o 1 de agosto, día do Baile do Club. Entre medias, procesións, desfiles, concertos de bandas de música (a saída de bandas é un dos momentos clave) e espectáculos das mellores orquestras de Galicia enchen de vida as rúas da Vila.

Fronte ao Festival Ortigueira, de confesada vocación internacional, a Padroa ten reforzado nos últimos anos o seu papel eminentemente local, recuperando o que ten de encontro con familiares e amigos. Celebracións semellantes, aínda que máis modestas, multiplícanse ao longo do verán nas 22 parroquias do municipio.