O Concello de Ortigueira conta con varios murais, obra todos eles do ilustrador local Cristian F. Caruncho e da muralista compostelá Lidia Cao.
Cada obra é unha homenaxe cargada de significado, emoción e sentimento.
Todo comezou no ano 2024, cando o Concello de Ortigueira decidiu decorar a entrada da vila de Santa Marta dende Ferrol, con un mural con claras alusións ao Festival Internacional do Mundo Celta.
O motivo elixido foi a Punkiereteira, que representa a unha «pandereteira» punk, fusionando deste xeito o tradicional co moderno.
Esta personaxe, inspirada no grupo musical de Ponteareas As Punkiereteiras, xa fora protagonista do libro infantil de Cristian, Saínza a Punkiereteria.
O ano 2025 foi especialmente prolífero para estes dous muralistas, xa que se lles encargaron dous traballos moi diferentes entre si.
Na primavera, Cristian e Lidia traballaron ante a atenta mirada dun público moi especial, os alumnos do CEIP José María Lage. A obra, financiada pola Deputación da Coruña, realizouse para conmemorar o 50 aniversario do centro.
A rapazada puido ver os avances diarios dos murais que ocupan dúas paredes. Nunha delas loce a Nena fan da Pukiereteira que está a ler un libro. Na outra están dúas das personaxes máis recoñecidas de Caruncho: “O Porco Bravo” e “O Moucho”. En ambas obras conviven outros debuxos de alumnos do CEIP José María Lage, que no seu día foron portada da revista escolar “A nosa voz”.
Dous meses despois, a finais de xullo de 2025, ambos artistas remataban o mural da Ghaiteira, homenaxe ó 50 aniversario da Escola de Gaitas de Ortigueira.
A Herdanza inaugurábase a principios de xuño de 2026, fronte ao IES de Ortigueira, unha pintura que nesta ocasión narra os vínculos entre avós e netos, coa música tradicional galega como fío condutor.
